Қонунчиликка киритилган ўзгартиришлар ҳақида

Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисидаги ЎРҚ-823-сонли қонуни айнан болалар ҳуқуқини ҳимоя қилишга ҳуқуқий асос бўлади ҳамда болаларни хорижий мамлакатлар ҳудудида зарур даражадаги васийлик ва ҳомийликсиз қолдиришнинг олдини олишга хизмат қилади.

Ўзбекистон Республикасининг Жиноят кодекси бола ҳуқуқига оид янги модда билан тўлдирилди (122¹-модда). Унга кўра, болани чет давлат ҳудудида назоратсиз қолдириш Ўзбекистон Республикаси фуқаролигига эга бўлган болани ота, она ёки уларнинг ўрнини босувчи шахс ёхуд ҳамроҳлик қилувчи шахс томонидан чет давлат ҳудудида назоратсиз қолдириш, худди шундай хатти-ҳаракат учун маъмурий жазо қўлланилганидан кейин содир этилган бўлса ёхуд Ўзбекистон Республикаси фуқаролигига эга бўлган ва чет давлат ҳудудида турган боланинг суд томонидан белгиланган муддатда Ўзбекистон Республикаси ҳудудига қайтарилишини таъминламаслик — базавий ҳисоблаш миқдорининг эллик бараваридан юз бараваригача миқдорда жарима ёки уч йилгача ахлоқ тузатиш ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади.

Ўша қилмиш такроран ёки хавфли рецидивист томонидан содир этилган бўлса, баданга ўртача оғир ёки оғир шикаст етказилишига сабаб бўлса — уч юз олтмиш соатдан тўрт юз саксон соатгача мажбурий жамоат ишлари ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.

Ўша қилмиш ўта хавфли рецидивист томонидан содир этилган бўлса,  жабрланувчининг ўлимига сабаб бўлса, бошқа оғир оқибатларга сабаб бўлса, — беш йилдан саккиз йилгача озодликдан маҳрум қилиш билан жазоланади.

Агар шахс Ўзбекистон Республикаси фуқаролигига эга бўлган боланинг Ўзбекистон Республикасига қайтарилишини жиноят аниқланган кундан эътиборан ўттиз кун ичида таъминлаган бўлса, жавобгарликдан озод қилинади, бундан ушбу модданинг иккинчи ва учинчи қисмларида назарда тутилган ҳоллар, шунингдек илгари ушбу модда бўйича жавобгарликдан озод қилинган шахслар мустасно».

Хулоса ўрнида айтиш мумкинки, мазкур Қонун болаларнинг ҳуқуқлари ва қонуний манфаатини ҳимоя қилиб, уларни чет давлат ҳудудида назоратсиз қолдириш учун ҳам жавобгарлик белгилайди.

 Термиз туманлараро иқтисодий судининг раиси Жумаев Диёр Бозорович.